ललिता निवास जग्गा प्रकरणमा बाबुरामको प्रश्न : मन्त्री दोषी, प्रधानमन्त्री कसरी निर्दोष ?

काठमाडौं । समाजवादी पार्टीका संयोजक डा. बाबुराम भट्टराईले ललिता निवास जग्गा प्रकरणमा अख्तियार दुरुपयोग अनुसन्धान आयोगले दर्ता गरेको मुद्दाप्रति सशंय व्यक्त गरेका छन् । उनले जग्गा हिनामिना प्रकरणमा केहिलाई अख्तियारले मुद्दा अगाडि बढाएको भएपनि मुख्य दोषीलाई नै ढाक्न खोजिएको भन्दै मुद्दा प्रक्रियाप्रति नै सशंय व्यक्त गरेका हुन् ।

पूर्वप्रधानमन्त्रीसमेत रहेका भट्टराईले जग्गा हिनामिना प्रकरणमा तत्कालिन मन्त्री दोषी हुने तर प्रधानमन्त्री निर्दोष देखिने कुरा त्रुटिपूर्ण रहेको टिप्पणी गरेका छन् । उनले अख्यिारको मुद्दा प्रक्रिया परिणाममुखीभन्दा प्रक्रियामुखी देखिएको पनि बताएका छन् ।

सामाजिक सञ्जाल ट्विटरमार्फत ललिता निवास जग्गा प्रकरणबारे बोल्दै भट्टराईले अख्तियारको मुद्दा प्रक्रिया नै सशंयपूर्ण भनि टिप्पणी गरेका हुन् । ‘देशमा व्याप्त भ्रष्टाचाररूपी क्यान्सरको एउटा अंश ललितानिवास प्रकरणमा अदुनिआको प्रयत्न स्वागतयोग्य छ तर, प्रथमदृष्टिया यसमा कतिपय त्रुटि र अपूर्णता देखिन्छ’ भट्टराईले भनेका छन्, ‘हाम्रा ऐनकानून र राज्यसंयन्त्र परिणाममुखी भन्दा प्रक्रियामुखी बढी भएकाले यस्तो हुनसक्छ, मन्त्री दोषी तर प्रम निर्दोष देखिदा ।’

‘म विष पिउन तयार छु तर निर्दोष नफसाईयोस्’

भट्टराईले जग्गा प्रकरणमा दोषीलाई छोड्ने र निर्दोषलाई फसाउने काम हुन नहुने बताएका छन् । उनले आफुँ ‘निलकण्ठ’ बन्न तयार रहेको बताउँदै दोषीलाई सत्ताको छहारीमा राखिने काम हुन नहुने टिप्पणी गरेका छन् ।

भट्टराईले सामाजिक सञ्जालमार्फत भनेका छन्, ‘मैले पनि असहजता महसूस गरेको छु ! सुर–असूर द्वन्दबाट निस्केको कालकुट विष पिएर शिवजी निलकण्ठ बने झैं देशलाई आवश्यक पर्छ भने म पनि ‘निलकण्ठ’ बन्न तयार छु तर, दोषीलाई छोड्ने, निर्दोषलाई फसाउने नहोस् ! वा जानीजानी दुष्कर्म गर्नेले सत्ताको छहारी पाउने तर परिबन्दले अघि देखिने चैं फस्ने नहोस् !’