जहाँ स्याल धपाउँदै बित्छ कर्मचारीको दैनिकी

कास्की । पोखरा विमानस्थल केही दिनदेखि स्यालको क्रिडास्थल बनेको छ । विमानस्थलको धावनमार्गमै स्याल दौडिन थालेपछि कर्मचारीसमेत हैरान भएका छन ।

विमानस्थल क्षेत्रमा केही समयदेखि स्याल दौडिन थालेपछि जहाज उडानमा समस्या भएको छ । कात्तिक लागेपछि धावन मार्गमै स्याल दौडिँदा जोखिम बढेको पोखरा विमानस्थलका प्रमुख भोलाप्रसाद गुरागाईंले बताए ।

‘कुकुर तथा स्यालको गतिविधि अलि बढि हुने महीना भएकोले पनि यो सिजनमा विमानस्थलमा उडानमै समस्या भइरहेको छ,’ उनले भने ।

दुर्घटना नहोस् भनेर नियमित स्याल धपाउनुपरेको उनी बताउँछन् । विमानस्थल प्रमुख गुरागाईंले स्यालका कारण पोखरा विमानस्थलमा कुनै उडान अवरुद्ध भने नभएको बताए।

‘स्यालका कारण कुनै उडान अबरुद्ध भएको छैन,’ उनले भने, ‘तर सम्भावित दुर्घटनालाई दृष्टिगत गर्दै सुरक्षा सतर्कता भने अपनाइएको छ ।’ विमानस्थलमा स्याललगायतका जंगली जनावर धपाउन छ जना कर्मचारी खटाइएको उनले बताए ।

‘स्याल र अन्य जंगली जनावर समाउनका लागि वन कार्यालयसँग समेत समन्वय गरिरहेका छौं,’ उनले भने । नजिकै सेती नदीको खोंच रहेका कारण वर्षेनी कार्तिक मंसिर महीनामा स्याल विमानस्थलसम्म आउने गरेको उनले बताए ।

त्यसो त धावनमार्ग नजिकै झाडी रहेका कारण पनि घाम ताप्नका लागि स्याले धावनमार्गमा आउने गरेका छन् । विमानस्थलको धावनमार्गमा बिहानीपख आधादर्जन भन्दा धेरै स्यालको बथान देखिने गरेका छन् ।

पोखरा विमानस्थलबाट काठमाडौं, भरतपुर, जोमसोम, मनाङलगायतका गन्तव्यमा गरी दैनिक ३० उडान हुने गरेको छ ।आर्थिक अभियानमा खबर छ ।