अनमोल केसीको प्रश्न- गोर्खा सब्जेक्ट हाम्रो हो, किन अक्षयकुमार खेल्दैछन् ?

काठमाडौं । वैशाख १ गते रिलिज हुने फिल्म ‘ए मेरो हजुर ४’ र दक्षिण भारतीय (साउथ) फिल्म ‘केजीएफ च्याप्टर २’लाई लिएर नेपालमा चर्चा छ । पछिल्लो समय नेपालमा साउथ फिल्मको दबदबा बढेको र हल सञ्चालकले नेपाली फिल्मलाई विभेद गरेको आरोप पनि लागिरहेको छ ।

ठूला मल्टिप्लेक्सले ‘केजीएफ-२’लाई ७५ शो दिएर नेपाली फिल्मलाई मुस्किलले दुई दर्जन मात्रै शो दिएर विभेद गरेको आरोप उनीहरुको छ । केही निर्माताले त विदेशी फिल्मलाई कडाइ गर्न माग गर्दै चलचित्र विकास बोर्डमा ज्ञापनपत्र समेत बुझाएका छन् ।

यस्तोमा ‘ए मेरो हजुर ४’का अभिनेता अनमोल केसीको स्टारडमलाई दिएर बढी अपेक्षा हुनु र स्टारडमको दबाब बढ्नु स्वभाविक नै हो । हालैको एक अन्तर्वार्तामा अनमोलले नेपाली फिल्मको वास्तविक प्रतिस्पर्धा हलिउड र बलिउडसँग रहेको बताउँदै सबैजना एक हुनुपर्ने खाँचो औंल्याएका छन् ।

नेपाली कथावस्तुमा समेत विदेशीले फिल्म बनाउन थालेको प्रसंग कोट्याउँदै उनले विदेशी फिल्मको डोमिनेट (दमन) नेपालमा बढेको समेत बताए । गोर्खा इतिहास र कन्टेन्ट नेपालको भएपनि अक्षयकुमारले त्यसमाथि फिल्म बनाउनु त्यसको उदाहरण भएको उनको कथन छ ।