प्रधानमन्त्री ओलीविरुद्ध शेरबहादुर देउवा आक्रामक, आवश्यक परे सडक संघर्ष नै गर्ने !

काठमाडौं । नेपाली कांग्रेस, नेकपा (माओवादी केन्द्र), जनता समाजवादी पार्टी, नेपालको उपेन्द्र यादव पक्ष, एमालेबाट निश्काषित माधव कुमार नेपाल पक्ष र जनमोर्चाको विपक्षी गठबन्धन प्रधानमन्त्री केपी शर्मा ओलीलाई सत्ताच्यूत गर्ने तयारीमा जुटेको छ ।

आज बसेको विपक्षी गठबन्धनमा नेताहरुले ओली सरकारले एकपछि अर्को गरेर संविधानमाथि घात गरेको र यसको मर्म र भावना कुल्चिएको निश्कर्ष निकालेका छन् ।

कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, एमालेबाट निश्काषित नेता माधव कुमार नेपाल, जसपाका अध्यक्ष उपेन्द्र यादव र जनमोर्चाकी सांसद दुर्गा पौडेलले संयुक्त विज्ञप्ती जारी गरेर असंवैधानिक कामको आलोचना गरेका छन् ।

उनीहरुले सरकारलाई दीर्घकालीन असर पर्ने कुनै पनि कामकारवाही नगर्न चेतावनी समेत दिएका छन् । आजको बैठकमा ओलीप्रति सबैभन्दा बढि आक्रामक रुपमा देउवा खनिएका थिए ।

उनले अदालतले संसद् पूनःस्थापना गर्ने विश्वास दिलाएका थिए । तर, ओली सरकारले गरेका असंवैधानिक निर्णय र गतिविधि अब सह्य नहुने भन्दै आवश्यक परे कडा संघर्षमा उत्रिनुपर्ने पनि देउवाको भनाई थियो ।

यसअघिको विपक्षी गठबन्धनको बैठकमा देउवा ओलीसँग नरम रुपमा प्रस्तुत हुँदै आएका थिए । उपेन्द्र यादवले सरकारविरुद्ध कडा खालको संघर्ष गर्नुपर्ने आवश्यक औंल्याएका थिए । यादवको प्रस्तावमा माधव नेपाल र प्रचण्ड दुवै सहमत थिए । तर, देउवाले कोरोना महामारीका कारण तत्काल सडकमा जाँदा नराम्रो सन्देश जाने धारणा राखेका थिए ।

बरु, मिडियामार्फत, सामाजिक सञ्जालबाटै सरकारको गलत क्रियाकलापको भण्डाफोर गर्नुपर्ने धारणा राखेका थिए । पछिल्ला दिनमा ओलीसँग सबैभन्दा बढि असन्तुष्ट र आक्रोशित देउवा बनेका छन् । उनले प्रतिनिधिसभाका बहुमत सांसदले आफूलाई प्रधानमन्त्री बनाउन हस्ताक्षर गरेको सशिर सदस्य सर्वोच्च अदालतमा उपस्थित् भएको भन्दै अदालतबाट आफूहरुअनुकुल निर्णय आउने विश्वास लिएका छन् ।

प्रधानमन्त्री ओलीले पुष ५ गते पहिलोपटक प्रतिनिधिसभा विघटन गर्दा सभापति देउवा मौन थिए । उनले ओलीको निर्णयविरुद्ध तत्काल पार्टीलाई सडकमा उतार्ने प्रयास गरेनन् । बरु, वरिष्ठ नेता रामचन्द्र पौडेल, कृष्णप्रसाद सिटौला, गगन थापा, प्रदीप पौडेललगायतका युवा नेताहरु पनि कांग्रेस संसद् विघटनको कदमविरुद्ध सडक संघर्षमा जानुपर्ने अडान लिएका थिए ।

तर, देउवाले त्यतिवेला कांग्रेसले प्रजातान्त्रिक पार्टी भएकोले अदालतको फैसला पर्खनुपर्ने भन्ने धारणा राखेका थिए । कतिपयले देउवाले त्यतिवेला प्रधानमन्त्री ओलीसँग भित्री रुपमा साँठगाँठ गरेको पनि आरोप लगाएका थिए । तर, ओलीले कांग्रेस चुनावबाट पनि नभाग्ने र अदालतको फैसला स्विकार्य हुने आफ्नो धारणा राखेका थिए ।

कतिपय संवैधानिक नियुक्तीमा समेत ओलीसँग देउवाले भागबण्डा मिलाएको आरोप लाग्ने गरेको थियो । तर, पछिल्लोपटक ओलीले संसद् विघटन गरेपछि सबैभन्दा बढि आक्रामक र असन्तुष्ट कांग्रेस देउवा नै देखिएका छन् ।

उनले ओलीले राष्ट्रपति विद्यादेवी भण्डारीमार्फत एकपछि अर्को गरेर असंवैधानिक काम गरेको र मुलुकलाई अँध्यारो मार्गमा अघि बढाएको भन्दै विरोध गरेका छन् । अहिले प्रतिनिधिसभा विघटनविरुद्ध अदालतमा दायर रिटमाथि सुनुवाई सुरु भएको छ । देउवा संसद् पूनःस्थापना हुनेमा विश्वस्त छन् ।

यो सँगै उनले सरकारविरुद्ध विरोध तथा प्रदर्शन र आन्दोलन अघि बढाउनुपर्ने भन्दै यसको लागि तयार हुनुपर्ने आजको बैठकमा धारणा राखेका थिए । उनले आजको बैठकमा भनेका थिए, “हामी विधि, कानूनी शासन र संविधानअनुसार चल्नुपर्छ । अहिलेको सरकार असंवैधानिक ढंगले अघि बढेको छ । यसलाई विस्थापित गर्नुपर्छ । आवश्यक परे सडक संघर्ष पनि गर्नुपर्छ । तपाईँहरु त्यही अनुसारको तयारी गर्नुहोस् ।”