मैत्रीपुर्ण खेलमा नेपाल २ का बिरुद्ध इराकको ६ गोल

काठमाडौँ, नेपाल र इराकबीचको मैत्रीपूर्ण फुटबल खेल सकिएको छ । इराकको बसरास्थित अल्फायहा बन्द रंगशालाको खेल मैदानमा राति सवा १० बजे शुरु भएको खेल भर्खरै सकिएको हो ।

कडा प्रतिस्पर्धि इराकसँग आमुन्ने सामुन्ने खेलेको नेपालले अन्तत हार व्यहोरेको छ । खेलमा इराकले नेपाललाई दुईका बिरुद्ध ६ गोल गर्दै जित हासिल गरेको छ । फिफा वरियतामा ६८ औँ स्थानमा इराक रहेको छ भने नेपाल १७१ औँ स्थानमा छ ।

कोरोना महामारीका कारण दर्शकलाई मैदान प्रवेशमा रोक लगाइएको अखिल नेपाल फुटबल संघ (एन्फा)ले जनाएको छ । इराकसँगको मैत्रीपूर्ण खेलका लागि नेपाली फुटबल टोली मंगलबार इराक गएको थियो ।

इराकसितको खेल खेलेपछि नेपाली टोली फिफा विश्वकप छनोट प्रतियोगिता खेल्न कुवेत जाने छ । मैत्रीपूर्ण खेल, विश्वकप छनोट र एसियन कप छनोटका लागि राष्ट्रिय टोलीका प्रशिक्षक अब्दुल्लाह अल्मुताइरीले २३ खेलाडी छनोट गरेका थिए । यसअघि पहिलो चरणमा ३२ खेलाडीलाई बन्द प्रशिक्षणमा सहभागी गराइएको थियो ।

समूह बीमा रहेको नेपालले विश्वकप छनोटअन्तर्गत जेठ २० गते चिनियाँ ताइपेइ, जेठ २४ गते जोर्डन र जेठ २८ गते अष्ट्रेलियासँग खेल्ने कार्यक्रम रहेको एन्फाले जनाएको छ । विश्वकप छनोटमा नेपालले हालसम्म छ खेलमा एउटामा जीत तथा पाँच खेलमा हार बेहोरेको छ ।

नेपाली टोलीका गोलरक्षकमा किरण चेम्जोङ, विशाल सुनार र दीप कार्की, डिफेन्डरमा रोहित चन्द, अनन्त तामाङ, दिनेश राजवंशी, गौतम श्रेष्ठ, सुमन अर्याल र विकास खवास, मिडफिल्डरमा विशाल राई, मनिष डाँगी, एरिक विष्ट, कमल थापा, सन्तोष तामाङ, सुमन लामा, सुनिल बल, सुरजजिउ ठकुरी, पुजन उपरकोटी र आयुष घलान तथा फर्वार्डमा अभिषेक रिजाल, अञ्जन विष्ट, नवयुग श्रेष्ठ र आशिष लामा रहेका छन् ।

राष्ट्रिय खेलकूद परिषद् (राखेप)का सदस्य सचिव रमेशकुमार सिलवाल पनि हाल नेपाली टोलीका साथ इराकमै रहेका छन् । नेपाली टोली जेठ २९ गते नेपाल फर्किनेछ ।