प्रचण्ड यसकारण डराए ओली सरकारबाट समर्थन फिर्ता लिन, माओवादीभित्र चर्को असन्तुष्टि

नेकपा (माओवादी केन्द्र) का नेता तथा राष्ट्रियसभा संसदीय दलका नेता दिनानाथ शर्माले नयाँ प्रधानमन्त्रीको उम्मेदवार अघि नसरेसम्म आफ्नो पार्टीले सरकारलाई दिएको समर्थन फिर्ता नलिने स्पष्ट पारेका छन्।

शर्माले आफूहरुले सरकारलाई दिएको समर्थन फिर्ता लिएर मात्रै समस्याको समाधान फिर्ता नहुने जिकिर गरे । उनले भने, ‘समस्याको समाधान हामीले समर्थन फिर्ता लिएर मात्रै हुँदैन। प्रधानमन्त्री हुन को तयार छ? नभए ओलीजी नै हुनुहुन्छ । अरु दलहरुले हिम्मत गर्नुपर्यो । प्रमुख प्रतिपक्षी दल वेटिंग इन गभर्मेन्ट हो। सत्ता पक्षले राज्य सञ्चालन गर्न सकेन भने, प्रतिपक्षी हिम्मत गरेर आउनुपर्यो् नि । हामी त नेकपा सरकारमै थियौं।’ तर, आफूहरु अहिले सरकारमा नभएको उनको भनाइ छ।

माओवादी केन्द्रका साथीहरु एमालेमै समाहित भएको पनि उनले सुनाए । नेकपा (एमाले) र नेकपा (माओवादी केन्द्र) बीच भोलि फेरि एकता पनि हुनसक्ने उनले सम्भावना सुनाए । सरकारमा सहभागी भएका माओवादी केन्द्रका साथीहरुलाई आफूहरुले पार्टीमा फर्कन अनुरोध गरेको सुनाए। उनले नेकपा एमाले नफुटोस भन्ने आफूहरुको चाहना रहेको सुनाए। उनले भने, ‘आन्दोलन नफुटाऔं। कांग्रेस पनि एक ढिक्का हुनुपर्छ। माओवादीलाई त्यस्तो समस्या छैन। एमालेभित्र देखिएको समस्या निषेध गर्नुहुन्न।’ सरकारको नेतृत्व गर्नेगरि कांग्रेस सभापति शेरबहादुर देउवा तयार भएर नआए आफूहरुले के गर्ने? भन्नेबारे अहिले छलफल गरिरहेको स्पष्ट पारे।

उनले पार्टीको नाम परिवर्तनबारे बैठकमा छलफल भए पनि त्यो एजेण्डा नभएको सुनाए। उनले अहिले आफ्नो पार्टीले सरकारको नेतृत्व गर्ने कुरामा कुनै दाबी नगरेको पनि जिकिर गरे। कांग्रेस र जसपाले सहमति गरेर आउँदा आफूहरुको समर्थन हुने उनको भनाई छ।

उनले नयाँ सरकार गठनको लागि सहमतिको आधारमा छलफल चलिरहेको सुनाए। तर, प्रधानमन्त्रीको टुँगो नलाग्दासम्म आफ्नो पार्टीले ओली सरकारलाई दिएको समर्थन फिर्ता नगर्ने जिकिर गरे। शर्माले भने, ‘नयाँ सरकार बन्ने बाटो सिर्जना नभएसम्म समर्थन फिर्ता लिँदैन। संकट निम्त्याउने मान्छे हामीलाई चाहिएको छैन। ओलीजीले संसद फेस गर्नुभएन। त्यो उहाँको एउटा कमजोरी भयो। संसद् पुनःस्थापना भएपछि उहाँ पछि फर्किएको भए, राजनीतिक एउटा सही बाटोबाट अघि बढ्थ्यो। हामीले संसदबाट जबरजस्ती अवस्थाबाट हटाउनुपर्ने अवस्था आयो। प्रधानमन्त्रीले राजीनामा दिएर मार्गप्रशस्त गर्न मान्नुभएको छैन। उहाँसँग हठ छ, त्यो नै उहाँको कमजोरी हो। हठले मान्छेलाई बिगार्छ। आग्रह र पूर्वाग्रह नराखी अघि बढ्नुपर्छ।’