मर्यादाहीन मान्छेलाई अध्यक्ष मान्न वाध्य भयौं – सूर्य थापा

प्रधानमन्त्री एवं नेकपा अध्यक्ष केपी शर्मा ओलीका प्रेस सल्लाहकार सूर्य थापाले नेकपाकै अर्का अध्यक्ष पुष्पकमल दाहाल प्रचण्डमाथि गम्भीर आरोप लगाएका छन् । उनले ‘मर्यादाहीन मान्छेलाई अध्यक्ष मान्न वाध्य भयौं’ भनेका छन् ।

नेकपाका केन्द्रीय सदस्यसमेत रहेका थापाले पञ्चायतले समेत लगाउन नसकेको आरोप प्रचण्डले ओलीमाथि लगाएको भन्दै मर्यादाहीन मान्छेलाई अध्यक्ष मान्न वाध्य भएको बताएका हुन् ।

नेपाली रेडियो नेटवर्कसँगको कुराकानीका क्रममा शुक्रबार बिहानै थापाले प्रचण्डले गैरजिम्मेवार भएर ओलीमाथि आरोप लगाएको समेत बताए । नेकपाको सचिवालयको बैठकका क्रममा प्रचण्डले गत शुक्रबार राजनीतिक प्रतिवेदनका रुपमा आरोपपत्र पेश गरेका थिए । उक्त आरोपपत्रमा ओलीले गरेका भ्रष्टाचार र बेथितिका चाङहरु प्रचण्डले बाहिर ल्याएका थिए ।

नेता थापाले प्रचण्डलाई आरोप लगाउन कुनै प्रमाणको पनि जरुरी नभएको र मन नपरेपछि जसलाई जे भने पनि हुने रहेछ भनी तर्क गरेका छन् । उनले अहिलेसम्म प्रतिपक्षी दल नेपाली कांग्रेसले समेत आरोप लगाउन नसकेका विषयमा प्रचण्डले आरोप लगाएको बताएका छन् ।

थापाले ‘मेरो आसेपासेको काम भएन भनेर सचिवालय बैठकमा अध्यक्षलाई आरोप लगाउनु गलत हो’ भनेका छन् । थापाले महाधिवेशनसम्म बहुमतका आधारमा नभइ सहमतिका आधारमा अगाडि बढ्ने सहमति भएको भन्दै अन्य सबै अफबाह भएको पनि स्पष्ट पारेका छन् ।