भारतद्वारा २८ भेन्टिलेटर सहयोग

भारत सरकारले नेपाललाई भेन्टिलेर सहयोग हस्तान्तरण गरेको छ। स्वास्थ्य तथा जनसंख्या मन्त्रालयमा एक कार्यक्रमका बीच भारतले २८ वटा भेन्टिलेटर सहयोग हस्तान्तरण गरेको हो।

नेपालका लागि भारतीय राजदूत विनयमोहन क्वात्राले स्वास्थ्यमन्त्री भानुभक्त ढकाललाई भेन्टिलेटर हस्तान्तरण गरे। भेन्टिलेटर हस्तान्तरणपछि राजदूत क्वात्राले कोभिड महामारीको समयमा दुबै देशलाई एकअर्काको आवश्यकता रहेको बताए।

स्वास्थ्यमन्त्री ढकालले आफू अप्ठ्यारोमा भएपनि भारतले विगतदेखि नै सहयोग गर्दै आएकोमा धन्यवाद व्यक्त गरे। मन्त्री ढकालले सहयोग प्राप्त भेन्टिलेर उपयुक्त ठाउँमा पठाउने बताए।

संक्रमण दर बढ्दो अवस्थामा रहेको उल्लेख गर्दै उनले बढी सक्रिय संक्रमित र गम्भीर खालका विरामी भएको ठाउँमा भेन्टिलेटर पठाउने उनले बताए।

अहिले नेपाल–भारत लगायत विश्वभरी नै कोरोना महामारीको संक्रमण बढ्दो छ। अहिलेसम्मको तथ्याङ्क अनुसार नेपालमा १ लाख ९१ हजार ६ सय ३६ जनामा संक्रमण देखिएको छ।

मन्त्रालयका अनुसार आजसम्म १ हजार ८७ जनाको कोरोनाबाट मृत्यु भएको छ भने १ लाख ५५ हजार ११४ जना संक्रमणमुक्त भएका छन्।