आलोचनापछि धमाधम दसैं भत्ता फिर्ता गर्दै सांसदहरू

महामारीका बेला दसैं भत्ता बुझेको भन्दै आलोचना भएपछि सत्तारूढ प्रतिपक्षी सांसदहरूले धमाधम भत्ता फिर्ता गर्ने बताएका छन्।

प्रमुख प्रतिपक्षी नेपाली कांग्रेसका सांसद गगन थापाले आज संघीय संसद सचिवालयमा भत्तावापतको रकम फिर्ता गरेका छन्।

थापाका स्वकीय सचिव सविनबाबु मुडभरीमार्फत् थापाले ६४ हजार ७० रूपैयाँ संसद सचिवालयमा फिर्ता दिएका हुन्।

‘संसद सचिवालयमा नगद नै फिर्ता गरिदिएको हो,’ मुडभरीले भने। यस्तै सांसद थापाले संसद सचिवालयलाई लेखेको पत्रमा भत्ता रकम फिर्ता लिन आग्रह गरेका छन्।

यस्तै सत्तारूढ नेपाल कम्युनिष्ट पार्टी नेकपाका सांसद भीम रावलले संघीय संसद सचिवालयलाई आइतबार पत्र लेख्दै भत्ता कट्टा गर्न आग्रह नै गरेका छन्।

आफ्नो खातामा पठाएको भत्ता फिर्ता लिन प्रक्रियागत अप्ठेरो आइपरे चेक वा अर्को महिनाको पारिश्रमिकबाट कट्टी गर्ने विकल्पसमेत रावलले संसद सचिवालयलाई दिएका छन्।

उनको खाता दसैं भत्ताबापत् ६४ हजार ७० रुपैयाँ आएको थियो। उनले भत्ता लिने व्यवस्था नै हटाउन पनि माग गरेका छन्।

प्रमुख प्रतिपक्षी कांग्रेसका प्रमुख सचेतक बालकृष्ण खाँणले पनि भत्ता रकम फिर्ता गर्ने बताएका छन्।

नेकपाका सांसदहरू जनार्दन शर्मा, देवेन्द्र पौडेललगायतले पनि दसैं भत्ता लिनु उचित नहुने बताएका छन्।

नेकपा प्रवक्तासमेत रहेका नारायणकाजी श्रेष्ठले राष्ट्रिय सभा सदस्यवापत् आउने पारिश्रमिक र भत्ता एक वर्ष नलिले यसअघि नै घोषणा गरेका थिए। उक्त रकम उनले कोरोना नियन्त्रण तथा उपचारका लागि खर्च गर्न सरकारलाई आग्रह गरेका थिए।

प्रदेशका सांसदहरूले पनि दसैं भत्ता नलिने बताएका छन्।

बागमती प्रदेशका आन्तरिम मामिला तथा कानुनमन्त्री शालिकराम जमरकट्टेलले दसैं भत्ता नलिने बताएका हुन्।

‘देश कोरोनाबाट आक्रान्त भइरहेका बेलामा चाडपर्व खर्चको रूपमा बागमती प्रदेशले मन्त्रीको हैसियतले आउने एक महिना बराबरको थप तलब नलिने र उक्त रकम कोरोना रोकथाम कोषमा जम्मा गर्ने जानकारी गराउँछु,’ उनले भनेका छन्।

बागमती प्रदेशमै साझा पार्टीकी सांसद रहेकी शोभा शाक्यले आफ्नो खातामा आएको दसैं खर्च फिर्ता गर्ने बताइन्।

‘मेरो खातामा आएको सो रकम मैले फिर्ता गर्ने जानकारी गराउन चाहन्छु। दसैं खर्च बापतको सो रकम कोरोना स्वास्थ्य कोषमा दाखिला गर्नुपर्छ,’ उनले भनिन्।